HATAW! D'yaryo ng Bayan hatawtabloid.com
MA at PA
ni Rommel Placente
NANAWAGAN ang direktor na si Lav Diaz kay Vice Ganda para tumakbo itong presidente sa 2028. Ang panawagan ay para labanan si Vice President Sarah Duterte.
Hiningan ng komento ang kaibigan at dating manager ni Vice na si Ogie Diaz sa panawagan ni direk Lav na sinagot nito ng, “Alam mo sa totoo lang no, why not!?”
Naniniwala si Ogie na kung tatakbo si Vice Ganda sa Presidential Elections sa 2028 ay mananalo ito kung talagang nakatadhana para sa kanya ang posisyon.
“Alam mo sa totoo lang no, sabi nga nila ‘di ba ang pagiging presidente ay destiny, malay mo destiny nga ni Vice ‘yan,” pahayag pa ni Ogie.
Well, abangan na lang natin kung tatanggapin ba ni Vice ang panawagan ni Direk Lav.
Sa pagkakaalam kasi namin ay wala siyang balak pumasok sa politika. Pero malay natin baka magbago ang kanyang desisyon.
Tungkol pa rin kay Vice Ganda, isa siya sa mga artista na hindi nawawala sa listahan ng top taxpayers sa bansa.
Kaya naman, hindi niya naikubli ang pagkadesmaya sa nagaganap na katiwalian sa bansa lalo’t nabunyag ang tungkol sa maanomalyang flood control projects na umano’y sangkot ng ilang mga politiko.
Sa kanyang noontime show, inilabas niya ang sama ng loob ng taumbayan sa patuloy na pagbabayad ng buwis kahit may katiwalaan.
Sabi ni Vice, “Sana ‘wag niyo kaming pagbayarin muna ng tax, sana may TAX HOLIDAY. Kasi ninanakaw niyo, eh. Kung talagang mahal ng mga nasa gobyerno ang mga Filipino, maglambing naman kayo pinanakaw niyo ang pera namin eh, ‘wag niyo muna kami pagbayarin. Hangga’t di naaayos.
“Hindi pwedeng ninakaw ninyo ‘yung tax namin, tapos magbabayad pa rin kami. Ibalik ninyo muna ‘yung ninakaw niyo sa ’min, ‘di ba?,”giit pa niya.
