Pilipinas, masinsinang naghahanda para sa sunod-sunod na pandaigdigang paligsahan sa larangan ng isports

MATAGAL nang ipinapahayag ni Senador Alan Peter Cayetano ang kanyang paniniwala na may kakayahan ang Pilipinas na magdaos ng mga pandaigdigang paligsahan sa isports. Ngayon, ang tiwalang ito ay unti-unting nagkakaroon ng katuparan.

Mula sa matagumpay na pagdaraos ng 2019 Southeast Asian Games hanggang sa record-breaking na FIBA World Cup noong 2023, patuloy na pinatutunayan ng bansa ang kakayahan nitong pag-isahin ang mga atleta, tagahanga, at mga pangunahing stakeholder sa pandaigdigang entablado.

Ang FIBA World Cup, sa partikular, ay higit pang nagpatibay sa reputasyon ng Pilipinas bilang isang mahalagang bahagi ng internasyonal na komunidad ng isports. Bagama’t matagal nang kinikilala ang bansa bilang isang basketball-loving nation, napatunayan nitong higit pa sa simpleng pagmamahal sa laro ang maihahandog ng Pilipinas — kundi isang antas ng pagho-host na umaabot sa pandaigdigang pamantayan.

Gayunman, sa mga nakaraang taon, maging sa mga lokal na kompetisyon, ang mataas na attendance records sa basketball, volleyball, at maging sa football ay nagpapakita ng lumalawak na suporta at interes ng mga Pilipino sa iba’t ibang larangan ng isports. Bagama’t hindi pa maituturing na powerhouse ang bansa sa mga ito, ang kakayahan nitong mag-organisa ng mga pangunahing torneo ay isang patunay ng patuloy na pag-unlad at kahandaan nito.

Ngayong papatapos na ang taong 2025, masinsinang naghahanda ang Pilipinas sa pinakamasikip nitong iskedyul ng pagho-host ng mga pandaigdigang paligsahan — kabilang na ang ilang unang pagkakataong pagdaraos ng mga prestihiyosong torneo.

FIVB Men’s Volleyball World Championship

MULA Setyembre 12 hanggang 28, inaasahang tatanggapin ng Pilipinas ang 32 pinakamahusay na men’s volleyball teams mula sa iba’t ibang panig ng mundo para sa FIVB Men’s Volleyball World Championship.

Bilang kasunod ng matagumpay at sunod-sunod na pagho-host ng Volleyball Nations League sa bansa, ang naturang torneo ay itinuturing na isa sa pinakamabibigat na hamon sa larangan ng internasyonal na pagho-host — lalo na’t ito ay isasagawa sa ilalim ng solo hosting arrangement.


Itatalaga bilang pangunahing lugar ng paligsahan ang Smart Araneta Coliseum at Mall of Asia Arena, samantalang ang mga makasaysayang pasilidad gaya ng PhilSports Arena, Rizal Memorial Coliseum, at Ninoy Aquino Stadium ay magsisilbing opisyal na training venues.

FIFA Futsal Women’s World Cup

SAMANTALA, isa na namang makasaysayang yugto ang nakatakdang ganapin sa bansa mula Nobyembre 21 hanggang Disyembre 7 — ang kauna-unahang FIFA Futsal Women’s World Cup. Ito ang unang pagkakataon na magdaraos ang Pilipinas ng anumang uri ng FIFA World Cup, kaya’t itinuturing itong makasaysayang hakbang hindi lamang para sa lokal na football kundi para sa isports sa pangkalahatan.

Isasagawa ang torneo sa dalawang pangunahing venues — ang PhilSports Arena sa Lungsod ng Pasig, at ang Victorias City Coliseum sa lalawigan ng Negros Occidental, kung saan lalahok ang labing-anim (16) na mga bansang kalahok.

Mas Marami Pang Darating

SA PAGDAGSA ng mga pandaigdigang kumpetisyon sa bansa, patuloy na binabago ng Pilipinas ang pagkakakilanlan nito sa larangan ng isports. Mula sa pagiging host ng mga panrehiyong kompetisyon, ngayon ay kinikilala na ito bilang maaasahang katuwang ng mga pangunahing internasyonal na sports federations.

Para kay Senador Cayetano at sa lahat ng naniniwala sa potensyal ng Pilipinas sa isports, ang mga milestone na ito ay simula pa lamang.

Hindi lamang ito tungkol sa pagho-host ng mga malalaking torneo — ito ay tungkol sa pagtataguyod ng isang matatag at pangmatagalang reputasyon, pagbibigay-inspirasyon sa mga susunod na henerasyon ng mga atleta, at pagpapatunay na ang Pilipinas ay may lugar sa pandaigdigang entablado ng isports.