HATAW! D'yaryo ng Bayan hatawtabloid.com
MAKASAYSAYANG panalo para kay Paolo Gallito ng Mandaluyong City, dinomina ang Finals ng Efren “Bata” Reyes Yalin 10-Ball Championships.
Tinalo niya si Lee Vann Corteza ng Davao City sa isang kapana-panabik na laban na nagtapos sa iskor na 13-12, na ginanap sa Pacman’s Cue Club, Lower Ground Floor, Worldwide Corporate Center, Shaw Boulevard sa Mandaluyong City nitong Sabado, Agosto 30, 2025.
Ito ang kanyang kauna-unahang malaking tagumpay.
“Masayang-masaya ako—hindi pa rin ako makapaniwala na isa na akong kampeon sa Philippine International Open. Ipinagmamalaki kong iuuwi ang tropeong ito,” sabi ng 25-anyos na si Gallito.
“Napakahirap ng laban. Ang final na ito ay mananatili sa alaala ko habang buhay. Isa si Lee Vann Corteza sa pinakamahusay sa buong mundo,” dagdag pa niya.
Sa kanyang paglalakbay patungong finals, tinalo ni Gallito si Bryan Paco, 11-5, upang makaharap si Corteza sa championship round, na siyang bumuwag naman kay Oliver Villafuerte, 11-8.
Dahil sa panalo, nag-uwi si Gallito ng P1 milyon, habang si Corteza naman ay tumanggap ng P300,000 bilang runner-up.
Ang torneo ay pinangasiwaan ng Games and Amusement Board (GAB) sa pamumuno ng kanilang chairman na si Atty. Francisco Rivera, sinuportahan ni Senador Manny Pacquiao, at inorganisa ng International Billiards and Snooker Champion na si Kap. Marlon Manalo. (MARLON BERNARDINO)
