HATAW! D'yaryo ng Bayan hatawtabloid.com
ISANG mini-tournament na lalahukan ng apat na koponan mula sa Ilocos Norte ang sasalubong sa pagdating ng “Set Na Natin ’To” Trophy at Mascot Tour sa darating na Sabado, Agosto 23, sa bagong bukas na SM City Laoag.
Ang mga koponang Block Builders, Laoag MVT, PSQ at NWU ang maglalaban-laban sa torneo na gaganapin sa Dap Ayan Park bilang tampok sa isa sa mga pangunahing aktibidad para sa FIVB Volleyball Men’s World Championship 2025, ayon kay Faivo Bartolome, isang charter member ng Philippine National Volleyball Federation (PNVF), presidente ng Ilocos Norte Volleyball, at sports consultant ng Ilocos Norte.
Ito rin ay magsisilbing makasaysayang araw bilang unang malaking aktibidad sa SM City Laoag, na binuksan lamang noong nakaraang Mayo.
Ayon kay Bartolome, naipadala na ang mga paanyaya kina Ilocos Norte Governor Cecilia Marcos, Vice Governor Matthew Manotoc, Laoag City Mayor James Bryan Alcid, at Vice Mayor Rey Carlos Fariñas para sa nasabing kaganapan na magsisimula ng 10 a.m. at magtatapos sa pormal na programa sa ganap na 6 p.m.
Ang three-city “Set Na Natin ’To” Trophy at Mascot Tour ay sinimulan noong nakaraang Sabado sa SM Seaside Cebu City at magtatapos sa darating na Sabado, Agosto 30, sa SM Downtown sa Cagayan de Oro City.
Samantala, ibinahagi ni PNVF president Ramon “Tats” Suzara na nasa tamang direksyon ang paghahanda ng Alas Pilipinas sa kanilang three-country European training camp at kasalukuyang nasa Santo Tirso, Portugal para sa huling bahagi ng kanilang paghahanda para sa world championship na gaganapin mula Setyembre 12 hanggang 28 sa SM Mall of Asia Arena at Smart Araneta Coliseum.
Ikinatuwa rin ni Suzara na naka-recover na mula sa injury ang mga beteranong manlalaro na sina Bryan Bagunas at Marck Espejo.
Ang mga ticket para sa tournament ay mabibili sa opisyal na website: https://www.philippineswch2025.com (PNVF Communications)
