Ces Quesada ibinuking lovelife ng pamangking si Martin

RATED R
ni Rommel Gonzales

PAMANGKIN ng beteranang aktres na si Ces Quesada ang Kapuso hunk actor na si Martin del Rosario.

Sa tsikahan namin ni Tyang Ces, tawag namin sa aktres, ayon sa kanya ay malihim si Martin pagdating sa personal nitong buhay, tulad na lamang ng lovelife.

Lahad niya, “Eversince, wala pang ipinakikilala sa amin, hindi ko alam, kung dahil wala ba siyang nakikitang pangmatagalan or dahil alam niya na ‘pag nakilala namin eh talagang tatanungin namin ng kung ano-ano. Ha! Ha! Ha!

‘“Yang batang iyan wala talaga kaming nababalitaan. Kapag magkakasama kami at binibiro namin, aba’y tatawa-tawa lang.

“So kinakantiyawan naming madalas na, ‘Ano ba, kailan mo ba kami ipakikilala? Kahit… hindi mo naman pakakasalan kaagad.’

“‘Yung bang dyowa lang, kasi gusto naming kiligin… wala! Tawa lang nang tawa tapos, eh darating din siguro tayo riyan, sabi ko, ‘Baka mamaya bibiglain mo lang kami.’”

Na bibiglain sila ni Martin na may nabuntis na pala ito, biro namin kay Tyang Ces.

“Ay sabi ko, ‘Dyusko ha, may mga pinsan kang babae, huwag kang ano!’

“Ibig sabihin alam natin na sa ganitong henerasyon ay iba na ‘yung ano nila, pero ang sa akin huwag sasaktan ang babae,” sabi pa ni Tyang Ces.

In-demand sa telebisyon at pelikula si Tyang Ces; kasali siya sa pelikulang Meg & Ryan na pinagbibidahan nina Rhian Ramos at JC Santos.

Ipalalabas ang Meg & Ryan sa mga sinehan dito sa Pilipinas sa August 6, 2025 at sa Australia at New Zealand sa August 14, 2025.

Mula sa direksiyon ni Catherine O. Camarillo at panulat ni Gina Marissa Tagasa, nasa pelikula rin sina Cedrick Juan, Jef Gaitan at introducing naman sina J-mee Katanyag, Steven Bansil, Poca Osinaga& Alison Black.

Mula ito sa Pocket Media Productions. Inc. at Pocket Media Films.