Hiro Magalona nakabalik kahit anim na taong nawala sa showbiz

MATABIL
ni John Fontanilla

NAG-UUMAPAW sa kasiyahan ang nagbabalik-showbiz na si Hiro Magalona dahil isa siya sa nabigyang parangal sa katatapos na Asia Pacific Topnotch Men and Women Achievers 2025 bilang Topnotch Young Actor of the Year.

Anim na taon nawala si Hiro sa showbiz at mas nag-focus sa pagnenegosyo at ngayon nga ay nagbabalik-showbiz.

At ang huling award na natanggap nito ay ang German Moreno Youth Achievement Award sa 62nd Famas Awards kasabay sina Ken Chan, Julia Barretto, Janine Guttierez, Jerome Ponce, at James Reid.

“Nakatutuwa kasi after six years na nawala ako sa showbiz hindi ko inaakala na sa pagbabalik ko magkakasunod-sunod ‘yung project na gagawin ko at ngayon may award pa.

“Kaya naman nagpapasalamat ako sa pamunuan ng Asia Pacific Topnotch Men and Women Achievers Awards, lalong-lalo na sa founder nito na si Direk Romm Burlat.

“Nagpapasalamat din ako sa manager ko kay Tito John at gusto ko ring i-congratulate ‘yung iba pang mga awardee.”

Mapapanood si Hiro sa advocacy film na Aking Mga Anak ng DreamGo Productions at sa panulat at direksiyon ni Jun Miguel.

Makakasama nito sa pelikula sina Natasha Ledesma, Patani, Klinton Start, Ralph Dela Paz, Toni Co, Art Halili Jr, Jace Salada atbp..