PNP Chief Torre sa mga pulis:
Serbisyong may malasakit pairalin

MAGSERBISYO nang may malasakit.

               Mahigpit itong ipinaalala ni Philippine National Police (PNP) chief Police General Nicolas D. Torre III sa kanyang mga tauhan na pairalin ang pagseserbisyo nang may malasakit para sa mas maayos na koneksiyon sa publiko.

Tiniyak ni Torre kasabay ng kanyang pahayag na walang pang-aabuso o extrajudicial killing na mangyayari habang siya ang hepe ng Pambansang Pulisya.

“Show compassion to those in distress, respond swiftly, and ensure the resolution of crimes,” ani Torre.

Ani Torre sa kanyang mga tauhan, walang puwang ang mga sangkot sa mga katiwalian at anomalya dahil buong organisasyon ang kanilang bitbit.

Gayonman, sinabi ni Torre na titiyakin niyang mabibigyan ng pagkilala ang mga tunay na nagtatrabaho at nagseserbisyo.

Aniya, alam niyang nakataya ang career at pangalan ng mga pulis na totoo sa pagtupad sa kanilang tungkulin kaya marapat lamang na kilalanin at bigyan ng parangal.