Don Bosco Tarlac Chess Team nagningning sa paligsahan ng chess sa Bangkok

NAGKAMIT ng mga individual awards ang Don Bosco Tarlac Chess team sa Red Knights Chess Club KIS International School Chess Championship 2025 na ginanap sa KIS International School Gym Hall sa Bangkok, Thailand noong Linggo, 1 Hunyo 2025.

Si James Henry Calacday, isang mag-aaral sa Grade 11, ay nakakuha ng ikalawang puwesto, at ang tanging pagkatalo niya ay kay Thailand Prodigy Pakorrnnarong Liukasemsarn ng Kings College sa Bangkok, na siyang nagkampeon sa taunang paligsahan ng chess ng KIS International School.

Si Mark Prellejera, isang mag-aaral sa Grade 12 ng Don Bosco Tarlac, ay nakakuha ng ikalimang puwesto sa kategoryang under 18, habang si Lucho David, isang mag-aaral sa Grade 6 ng Don Bosco, ay nakakuha ng ikaapat na puwesto sa kategoryang under 13.

Ang ibang manlalaro ng Don Bosco na sina Margaret De Leon at Marthena De Leon ay nakakuha ng ika-16 at ika-19 na puwesto ayon sa pagkakasunod.

Ang nasabing kompetisyon ay sinalihan ng 200 mag-aaral mula sa iba’t ibang paaralan sa Thailand at karatig na mga bansa, na ang Don Bosco Tarlac City ang kumakatawan sa Filipinas. (MARLON BERNARDINO)