HATAW! D'yaryo ng Bayan hatawtabloid.com
HINDI nakaligtas sa kamatayan ang isang guro, ang kaniyang asawa, at dalawa nilang anak sa sunog na tumupok sa kanilang bahay sa lungsod ng Malolos, lalawigan ng Bulacan, nitong Miyerkoles ng umaga, 21 Mayo.
Kinilala ng mga awtoridad ang mga biktimang sina Maricel Santos Caluag, 49 anyos, isang guro sa Bulihan Elementary School; kaniyang asawang si Phillip Caluag, 49 anyos; at kanilang mga anak na sina Felice, 18 anyos, at Julien Lucius, 10 anyos.
Samantala, nakaligtas sa sunog ngunit sugatan ang kanilang 15-anyos na anak na lalaking si Yan na kasalukuyang nilalapatan ng lunas sa kalapit na pagamutan.
Ayon kay Malolos Fire Station chief investigator SF01 Erwin Parungao, nagsimula ang sunog dakong 4:00 ng madaling araw kahapon sa loob ng bahay ng pamilya Caluag, sa Alido Heights, Brgy. Bulihan, sa naturang lungsod.
Tuluyang naapula ng mga bombero ang sunog dakong 4:18 ng madaling araw.
Patuloy ang imbestigasyon ng mga awtoridad upang matukoy ang sanhi ng sunog.
