HATAW! D'yaryo ng Bayan hatawtabloid.com
TULOY ang implementasyonang No Contact Apprehension Policy (NCAP) sa Lunes, 26 Mayo, ayon kay Metropolitan Manila Development Authority (MMDA) Chairman Romando Artes.
Ito ay matapos paboran ng Korte Suprema nitong Martes, 20 Mayo, ang inihaing urgent motion to lift temporary restraining order (TRO) ng Office of the Solicitor General sa suspensiyon ng NCAP noong Agosto 2022.
Inilinaw ng Korte Suprema, na partially lifted lang ang TRO kaya’t saklaw lamang ang mga pangunahing lansangan kabilang ang EDSA at C5.
Ikinatuwa ng MMDA ang desisyon na nagsabing magbibigay-daan ito sa mas epektibong solusyon na mapaluwag ang mabigat na trapiko, lalo na sa napipintong rehabilitasyon ng EDSA.
“With the announced scheduled massive rehabilitation of EDSA, which is set to commence on June 13, the MMDA expects heavier traffic,” ayon sa MMDA.
Sa sandaling maibalik, inaasahang palalakasin ng NCAP ang traffic management ng MMDA sa kahabaan ng EDSA at iba pang mga pangunahing daanan sa pamamagitan ng paggamit ng mga closed-circuit television (CCTV) camera, digital camera, at iba pang teknolohiya upang kumuha ng mga video at larawan ng mga lumalabag sa trapiko, magtala ng mga paglabag sa trapiko, at mag-isyu ng mga citation.
Tiniyak ng MMDA sa mga petisyoner na kumukuwestiyon sa NCAP na ang kanilang mga alalahanin ay natugunan sa single ticketing system at sa bagong mga alituntunin ng NCAP.
