HATAW! D'yaryo ng Bayan hatawtabloid.com
ARESTADO ang isang 40-anyos construction worker matapos tangkaing sunugin ang isang kapilya ng Iglesia Ni Cristo (INC) sa Brgy. Soledad, bayan ng Mauban, lalawigan ng Quezon, nitong Lunes, 19 Mayo.
Ayon sa pulisya, armado ang suspek na kinilalang si alyas Arjay, ng tatlong Molotov cocktail bomb, saka pumasok sa loob ng kapilya.
Sinubukan siyang awatin at pigilan ng mga miyembrong nasa loob ng kapilya ngunit hindi siya nakinig.
Sinira umano ng suspek ang isa sa mga bintana saka inihagis ang dalang pampasabog na pinagmulan ng apoy na agad din naapula ng mga miyembro.
Umalis ang suspek at nagbantang babalik upang tuluyang sunugin ang kapilya.
Nadakip ang suspek sa ikinasang follow-up operation ng pulisya sa Brgy. Sadsaran, sa naturang bayan.
Samantala, tinatayang nagkakahalaga ng P50,000 ang pinsala sa kapilya dahil sa insidente.
