Tiangco nagpatalo sa ‘Alyansa’

‘PALPAK’ ang pagtimon ni Alyansa campaign manager Toby Tiangco sa mga kandidato ng administrasyon sa katatapos na midterm elections.

               Pinag-uusapan ito ng mga political spectator, at mismong sa hanay ng alyansa base sa resulta ng katatapos na eleksiyon.

Anila, mismong si President Ferdinand “Bongbong” Marcos, Jr., ay nagsabi na mas maganda sana ang resulta ng kampanya — ngunit halos sa buong kapuluan tambak ang Alyansa, bugbog sa Mindanao, bokya sa overseas voting ng OFW sa Asia Pacific, Middle East, America, at Europa.

Lumalabas umano na hindi binigyang pansin ni Tiangco ang impeachment issue kahit na ang mayorya ng mga bumoto ay kampi sa pagsulong nito dahil sa mabibigat na krimen na isinampa laban kay VP Sara Duterte lalo na sa korupsiyon sa kanyang confidential funds.

Kaya hindi nagamit ng Alyansa ang isyu sa mga nakababatang botante na siyang may pinakamalaking bilang ng mga bumoto. Hindi bumoto si Tiangco bilang kongresista sa pag-impeach kay VP Sara.

Nagkagulo sa local elections na ang mga kaalyansa ng administrasyon ay naglaban-laban kaya hindi nila nabigyan ng pansin ang Alyansa candidates.

Sinisisi ni Sultan Kudarat Gov. Pax Ali Sangki Mangudadatu ang mga lider ng Alyansa sa “sobrang politika imbes na serbisyo sa tao.”

“Walang naramdaman na tulong ang ating mga kababayan kaya wala silang (Ang Alyansa) nakuhang suporta.”

Aniya, “Dahil hindi naramdaman agad-agad because of politics, nagkaroon ng away, nagkaroon ng national divide, inuna ‘yung politika, ang nakita tuloy ng taongbayan ay ‘yung mga performance ng nakaraang administrasyon…may mga programa na hindi tinuloy, may pondo pero dahil sa politika, sinabi na huwag na muna ituloy.” (NIÑO ACLAN)