HATAW! D'yaryo ng Bayan hatawtabloid.com
HATAW News Team
DALAWANG Chinese national at tatlong Pinoy ang inaresto matapos iturong sangkot sa human trafficking habang nasagip ang 10 biktima sa pagsalakay ng National Bureau of Investigation (NBI) sa isang palaisdaan sa Sual, Pangasinan nitong 1 Mayo.
Iniharap ng NBI ang mga suspek na sina Zhonggang Qui, Wenwen Qui, alyas Angielyn, alyas Maricelle, at alyas Jay, na pawang sinampahan ng kasong paglabag sa Republic Act 9208 (Anti-Trafficking in Persons Act of 2003), na inamyendahan ng RA 10364 at RA 11862, R.A. 9231 (An Act Providing For The Elimination of The Worst Forms of Child Labor), RA 8550 (The Fisheries Code of the Philippines), at RA No. 12022 for Economic Sabotage.
Ayon sa NBI nakatanggap sila ng intelligence report laban sa isang Hou Shillian, na may mga empleyadong menor de edad kabilang ang ilang undocumented foreign nationals, na ikinukulong sa kanyang compound sa Brgy. Baquioen, Sual, Pangasinan kaya agad sinalakay ang lugar.
Sinabi ng mga biktima na matapos silang irekrut mula sa Northern Samar, napilitan sila sa mapanganib na trabaho sa paghahakot ng feeds patungo sa fish cage sa Lingayen Gulf.
Hindi rin rehistrado ang fish pen na nagdudulot ng panganib sa kapaligiran.
