HATAW! D'yaryo ng Bayan hatawtabloid.com
NASAKOTE ang pitong wanted na indibiduwal sa magkakahiwalay na operasyong isinagawa ng Bulacan PPO mula 5 hanggang 6 Mayo, bilang bahagi ng pinaigting na kampanya laban sa kriminalidad at pagsasakatuparan ng mga warrant of arrest.
Kabilang sa mga naaresto ang isang indibiduwal sa bayan ng Doña Remedios Trinidad (DRT) na may kasong paglabag sa RA 7942 o Philippine Mining Act; habang ang isang akusado ay nadakip sa bayan ng Plaridel sa kasong Acts of Lasciviousness; at isa sa bayan ng Bustos sa kasong paglabag sa Municipal Ordinance.
Samantala, dalawa pang suspek na may apat na bilang ng kasong theft ang inaresto ng 1st Provincial Mobile Force Company (PMFC), habang ang Bulacan Provincial Intelligence Unit (PIU) ay nakaaresto rin ng dalawang indibiduwal na may kasong paglabag sa RA 10883 o New Anti-Carnapping Act, at Frustrated Homicide.
Pawang nasa kustodiya ng kani-kanilang mga arresting unit ang mga suspek para sa kaukulang dokumentasyon at pagsasampa ng kaso.
Ayon kay P/Col. Franklin Estoro, provincial director ng Bulacan PPO, ang matagumpay na operasyon ay patunay ng patuloy na pagpupursige ng Bulacan PNP sa paghabol sa mga taong may kinahaharap na kaso. (MICKA BAUTISTA)
