HATAW! D'yaryo ng Bayan hatawtabloid.com
TINUKOY ng Philippine National Police (PNP) ang dalawang casino junket operators na pinagdaanan ng ransom money sa pagdukot at pagpatay sa negosyanteng si Anson Que.
Ayon kay PNP Spokesperson PBGen. Jean Fajardo, kasama sa dinaluyan ng money trail ang 9 Dynasty Group at White Horse Club.
Ani Fajardo, ang nasa likod ng 9 Dynasty Group ay si Mark Ong na may Chinese name na Li Duan Wang.
Hindi ordinaryong casino ang 9 Dynasty dahil ginagamit ito para ipuslit at ‘pinaglalabadahan’ ng ransom money, drug money, at iba pang dirty funds.
Sinabing ilan sa mga kompanya ni Wang sa Filipinas ay konektado sa gaming, IT support, real estate, at cryptocurrency.
Hindi muna pinangalanan ng PNP ang nasa likod ng White Horse Club.
Bilang legal na aksiyon, ipare-revoke ng PNP ang junket operator’s Authority to Operate and Junket Agreement sa naturang mga Casino at ang pag-freeze ng pondong konektado sa kidnap-for-ransom o money laundering, kabilang ang mga digital o virtual assets.
Ibinunyag ni Fajardo na isinasagawa ng grupo ang kanilang mga transaksiyon sa pamamagitan ng mga app at website na walang malinaw na lisensiya mula sa Bangko Sentral ng Pilipinas (BSP) at sa Anti-Money Laundering Council (AMLC).
Gumagamit din ang grupo ng over-the-counter (OTC) system upang hindi matukoy ang pinagmulan ng pera na ipinapasok sa kanilang operasyon.
Kaugnay nito, itinaas ng PNP sa P10 milyon ang pabuya para sa mga makapagbibigay ng impormasyon sa ikaaaresto ni Wenli Gong, alyas Kelly Tan Lim, sinasabing co-mastermind sa krimen. (HNT)
