HATAW! D'yaryo ng Bayan hatawtabloid.com
Sa paglapit ng pagdiriwang ng Araw ng Paggawa sa Mayo 1, muling iginiit ng TRABAHO Partylist ang kanilang matibay na paninindigan sa pagtataguyod ng kapakanan ng mga manggagawang Pilipino.
Binigyang-diin ng partylist, bilang 106 sa balota, ang kahalagahan ng pagkakaroon ng pangmatagalang trabaho, makatarungang sahod, at mas pinahusay na proteksyon para sa mga manggagawa.
Kaugnay ng anunsyo ng Department of Labor and Employment (DOLE) na may 37,000 job vacancies sa 63 job fairs na gaganapin sa buong bansa, positibong tinanggap ito ng TRABAHO Partylist bilang hakbang upang mapababa ang antas ng kawalan ng trabaho.
Gayunpaman, binigyang-diin ng grupo na hindi lamang dami ng trabaho ang dapat isaalang-alang, kundi pati na rin ang kalidad ng mga ito at ang benepisyo para sa mga manggagawa.
“Hindi lang ito tungkol sa dami ng trabahong iniaalok; dapat tiyakin na ang mga ito ay may makatarungang pasahod, seguridad sa trabaho, at pagkakataong umunlad,” pahayag ni Atty. Mitchell-David L. Espiritu, tagapagsalita ng TRABAHO Partylist.
Batay sa pinakahuling survey ng Social Weather Stations (SWS), 89% ng mga Pilipino ang sumusuporta sa mga platapormang nakatuon sa paglikha ng trabaho, isang pangunahing adbokasiya ng TRABAHO Partylist.
Patuloy ang grupo sa pagsusulong ng mga polisiyang naglalayong pagandahin ang kalidad ng trabaho at palawakin ang benepisyong natatanggap ng mga manggagawa, upang ang pag-unlad ng ekonomiya ay madama ng bawat Pilipino.
Sa nalalapit na Labor Day, nananatiling tapat ang TRABAHO Partylist sa kanilang adhikain na isulong ang karapatan at kapakanan ng mga manggagawang Pilipino, pati na rin ang kanilang patas na oportunidad sa trabaho.
