Gwen Garci, retired na sa pagpapa-sexy!

ALAM MO NA!
ni Nonie Nicasio

NAPAPANOOD ngayon si Gwen Garci sa TV series na “Lolong” ng GMA-7, na tinatampukan ni Ruru Madrid. Bukod dito, isa rin ang aktres sa casts ng pelikulang “Isolated”, starring Joel Torre, Yassi Pressman, at iba pa.

Medyo nagpahinga si Gwen, ayon sa aktres. Dahil daw naging Estrikto ang BIR sa ginagamit niyang resibo.

Esplika ng dating member ng Viva Hot Babe, “Ang tagal ko rin nawala, kasi iyong resibo ko may problema rati, hindi kasi siya sa entertainment. At naging strict sila sa BIR na kailangan entertainment actor ang nakalagay sa resibo na gamit mo.

“Kaya inayos ko muna, strict sila now. Dapat ang resibo ay entertainment or actor. Hindi puwedeng for real estate or ‘di pwedeng gamitin mo iyong ibang resibo.”

Game pa rin ba siyang magpa-sexy sa movies? “Hahaha! Parang tapos na ako roon, e,” nakatawang tugon ng aktres.

Ayaw na ba talaga niyang magpa-sexy sa pelikula o depende ito kung maganda ang project na io-offer sa kanya?

“Palagay ko, parang kailangan na nating ibigay sa mga bagets iyan, hahaha!” Pahalakhak na bulalas pa ni Gwen.

Nabanggit din niya ang role na ginagampanan sa Lolong.

“Ang role ko sa Lolong, ako ‘yung may-ari ng beerhouse na roon nagtatrabaho si Elle Villanueva, isa siya sa mga alaga ko. At isa rin akong mamasang dito, na isang babaeng bakla,” nakangiting sambit niya.

Sino ang madalas niyang kaeksena rito? Aniya, “Si Elle Villanueva at si Ruru Madrid.”

Ayon pa sa aktres, mababait at okay katrabaho ang co-stars niya sa Lolong.

“Lahat naman sila mababait, Lalo na si Ruru… so wala naman akong masasabing hindi okay dito.”

Inusisa rin namin siya hinggil sa kanilang pelikulang Isolated.

Aniya, “Pang-16 and up ito… iyong role ko rito ay isang battered wife na sa sobrang frustration, iyong ginagawa sa akin ng asawa ko ay ginagawa ko naman sa anak ko. At iyon ‘yung ginagampanan ng batang Joel Torre.”

Saan siya mas nag-e-enjoy, sa TV or movies? Anong role na natotoka sa  kanya ang mas gusto niya?

Tugon niya, “Sa TV ako mas nag-e-enjoy. Bakit? Kasi, mas mahaba siya, hindi gaya ng movies, saglit lang. Kumbaga, after napanood sa sinehan, iyon na iyon, tapos na.”

Pahabol pa ng aktres na super-sexy pa rin, “Enjoy ko rin naman ang gumawa ng comedy…”

May dream role pa ba siya na wish magampanan?

“Siguro iyong isang psycho role o kaya ay isang action project ang gusto kong gawin. Kasi, matagal na akong hindi nakaGagawa ng project na action,” pahayag pa ni Ms. Gwen.