Alas Pilipinas Maganda ang simula sa AVC Beach Tour

NAGSIMULA ng maganda ang Pilipinas sa Rebisco Asian Volleyball Confederation (AVC) Beach Tour Nuvali Open nang magwagi ang Alas Pilipinas Men at Women teams noong Miyerkules sa Lungsod ng Santa Rosa, Laguna.

Ang kampeon ng Philippine National Volleyball Federation (PNVF) Invitationals na sina Khylem Progella at Sofia Pagara ay nagpakita ng solidong performance sa umaga, na gumawa ng 21-8, 21-18 na panalo laban kina Ee Ling Pua at Rachael Go ng Malaysia sa world-class na Nuvali Sand Courts By Ayala Land.

Si Rancel Varga at James Buytrago naman ay nagbigay ng magandang laban bago ang magtanghali, tinalo ang mga taga-Uzbekistan na sina Mustafoev Golibjon at Nodirjon Alekseev, 21-13, 21-6.

 Nangako sina Progella at Pagara na magsusumikap pa lalo.

“We may have relaxed a little bit in the second set, but we realized quickly that straight-sets wins are crucial in pool play,” sabi ni Progella.

Dagdag ni Pagara na ang kanilang approach sa tournament ay may bagong mindset matapos makipagkompetensya noong nakaraang taon sa Asian Seniors Beach Volleyball Championships.

“We feel a lot more confident this time, although the preparation is shorter,” ani Pagara.

Samantala, ang mga kampeon ng University Athletic Association of the Philippines na sina Kat Epa at Honey Grace Cordero ay naghikayat ng magandang simula sa AVC ngunit hindi pinalad at natalo laban kina Saki Maruyama at Miki Ishii ng Japan, 12-21, 21-19, 9-15, sa isang nakaka-excite na opening match sa center court.

Ang star players ng National University ay nakipagsabayan laban sa Japan sa isang 47-minute na laban sa tournament na inorganisa ng PNVF sa pangunguna ng presidente na si Ramon “Tats” Suzara, na siya ring pangulo ng AVC.

Nagbigay ng matinding laban sina Lerry John Francisco at Edwin Tolentino laban sa mga Asian Senior Beach Volleyball Champions na sina D’Artagnan Potts at Jack Pearse ng Australia bago tuluyang natalo, 17-21, 18-21.

Ang pares na Australyano ang nagbigay ng malaking pagsubok sa Pilipinas sa unang araw, nang tinalo nina Paul Burnett at Luke Ryan sina Ronniel Rosales at Alexander Jhon Iraya, 21-13, 21-18.

Ang mga runner-up ng Nuvali Open 2024 na sina Pithak Tipjan at Poravid Taovato ng Thailand ay nakabawi mula sa isang mahirap na simula at tinalo ang mga taga-China na sina Song Jinyang at Zhang Tai, 16-21, 21-9, 15-10, habang ang mga taga-Indonesia na sina Bintang Sofyan at Akbar Efendi ay tinalo sina Yuan Mao at Yuan Liu ng China, 21-18, 21-16.

Ang mga taga-New Zealand na sina Bradley Fuller at Ben O’Dea ay madaling tinalo ang mga taga-Hong Kong na sina Lee Cheukhei at Lee Litfung, 21-11, 21-11. (HNT)