Sa 24-28 Marso
Ilalim ng Marilao Interchange sarado para sa repair
TOLL FEE MULA BALINTAWAK HANGGANG MEYCAUAYAN LIBRE

PINAPAYOHAN ang mga motorista na dumaan sa mga alternatibong ruta dahil sa pansamantalang pagsasara ng bahagi ng North Luzon Expressway sa ilalim ng Marilao Interchange Bridge northbound upang ayusin ngayong linggo.

Nakatakdang ayusin ang bahaging ito ng NLEX mula ngayong Lunes, 24 Marso ng 1:00 ng hapon, hanggang 11:00 ng gabi sa Biyernes, 28 Marso.

Ayon sa pamunuan ng NLEX, dalawang lane – pinakakaliwa at pinakakanan, ang maaaring daanan ng mga motorista, at maglalaan ng zipper lang lane sa southbound kung kinakailangan.

Matatandaang napinsala ang tulay ng isang 18-wheeler truck na patungong Bataan noong isang linggo.

Ang truck ay may taas na 4.9 metro, lagpas sa 4.2-metrong vertical clearance limit.

Dahil dito, magpapatupad rin ang NLEX ng pansamantalang toll relief mula Balintawak hanggang Meycauayan simula 12:00 ng tanghali ngayong araw.

Mananatiling libre ang toll fee hanggang sa muling mabuksan ang apat na northbound lane sa Marilao.