HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez
INALMAHAN ni Sharon Cuneta na ang mga naglalabasang fake news tungkol sa asawang si Kiko Pangilinan.
Idinaan ni Sharon ang paglalabas ng saloobin sa pamamagitan ng isang video statement na in-upload sa iMPACT Leadership Facebook page. Hindi na kasi nakatiis si Sharon sa kaliwa’t kanang fake news ukol sa asawang tumatakbo muling senador sa May, 2025 elections.
“Eh, wala hong tigil ang mga tsismis na peke naman tungkol sa kanya lalo ngayon na siya ay tumatakbo ulit para senador.
“Eh, ang lakas po ng impluwensiya ng social media ‘di ho ba? Lalo na ngayon at lalo na kapag nega at may malisya,” ani Sharon.
“Ayon po sa mga social scientists, kapag daw ang isang kasinungalingan o fake news ay paulit-ulit pong ipinagkalat at paulit-ulit ipinakita sa inyo o sa taumbayan, maya-maya po, aba’y, mayroon na pong maniniwala.”
Iginiit pa ni Sharon na lahat ay pawang pekeng balita ang ibinabato kay Kiko.
Aniya, isang mabuting asawa at ama si Kiko at napatunayan niya ito sa mahigit tatlong dekada nilang pagsasama.
“Kapag siya po ay nangako talaga pong harangan man ng sibat kailangang tuparin niya. Ganoon po siya sa amin. Nagawa na niya at gagawin po niya ulit,” pahayag pa ni Sharon.
