Nasagasaan ng truck matapos mabunggo ng MPV Laborer patay sa Antipolo

NAMATAY noon din ang isang 35-anyos construction worker matapos mabangga ng isang multi-purpose vehicle (MPV) at masagasaan ng isang 16-wheeler truck habang tumatawid sa kalsada sa lungsod ng Antipolo, lalawigan ng Rizal, nitong Martes, 11 Pebrero.

Sa kuha ng CCTV, tumatawid ang biktima sa Antipolo-Teresa Road upang bumili ng almusal nang mabangga ng puting MPV, dahilan upang bumagsak siya sa kabilang lane.

Habang nakandusay sa kalsada, nasagasaan siya ng paparating na 16-wheeler truck na naging sanhi ng malalang pinsala sa kaniyang ulo at naging dahilan ng kaniyang agarang kamatayan.

Ayon sa isang saksi, walang gaanong sasakyan sa kalsada ngunit mabilis magpatakbo ang driver ng Innova na unang nakabunggo sa biktima.

Boluntaryong sumuko sa mga awtoridad ang driver ng truck na kasalukuyan nang nasa kustodiya ng pulisya at nahaharap sa kasong reckless imprudence resulting in homicide.

Samantala, nanawagan ng pamilya ng biktima sa driver ng MPV na sumuko at harapin ang batas.

Patuloy ang paghahanap ng mga tauhan ng Antipolo CPS sa suspek na sasampahan ng parehong mga kaso.