HATAW! D'yaryo ng Bayan hatawtabloid.com
AGAD namatay ang isang 42-anyos kagawad ng barangay habang nasa kritikal na kondisyon ang kaniyang tauhan, nang sumabog ang isang vintage bomb na sinusubukan nilang buksan gamit ang lagari nitong Sabado, 8 Pebrero, sa bayan ng Bambang, lalawigan ng Nueva Vizcaya.
Kinompirma ni P/Maj. Nova Lyn Aggasid, tagapagsalita ng Nueva Vizcaya PPO, na agad binawian ng buhay ang kagawad habang naputol ang mga paa ng kaniyang 33-anyos tauhan mula sa Nueva Ecija, at kasalukuyang nasa kritikal an kondisyon sa Region II Trauma and Medical Center, sa Bayombong, sa naturang lalawigan.
Nabatid na nahukay ang vintage bomb sa isang project site kung saan contractor ang kagawad sa Brgy. San Antonio North, sa Bambang.
Sa paniniwalang maaaring may lamang ginto ang bomba, dinala nila ito sa kaniyang bahay sa Brgy. Almaguer South.
Sinubukan nila itong buksan gamit ang lagari na nagmitsa sa pagsabog nito.
Agad nagtungo ang mga kapitbahay upang sila ay daluhan matapos marinig ang malakas na pagsabog na nauna nilang inakalang dahil sa tangke ng gas o sa transformer ng koryente.
Kasalukuyan nang sinusuri ng Provincial Explosives and Canine Unit sa Nueva Vizcaya ang mga natira sa bomba upang matukoy ang uri nito.
Samantala, sinabi ni Aggasid na aksidente ang pagsabog at hindi magsasampa ng kasong kriminal ang mga awtoridad.
Pinanawagan din niya sa publiko na agad iulat sa mga awtoridad kung may makikitang vintage bomb at huwag tatangkaing hawakan.
