Daniel mas nalalapitan ngayon ng fans, dinadagsa at pinagkakaguluhan

HATAWAN
ni Ed de Leon

NANINIWALA kaming mas sumikat at mas tumibay ang career ngayon ni Daniel Padilla nang mahiwalay kay Kathryn Bernardo. Nakita namin ang mga video kung paano siya pagkaguluhan ng libo-libong taong nanood sa isang mall at dagsa rin ang mga tao sa kanyang ginagawang provincial shows. 

Ngayon bukod sa dating pakikipag-love team lamang sa pelikula, napatunayan niyang hit din siya sa mga concert, show na kanyang ginagawa. Mas lalong na-discover ng mga tao ang kanyang kakayahang kumanta. At dumami ang kanyang fans.

May nagsasabi pang naging mas malapit ngayon si Daniel sa kanyang fans, kasi noong araw bago niya maisipang lapitan ang fans niya, una niyang binabantayan at binibigyang proteksiyon si Kathryn. Kaya pati siya ay hindi na malapitan ng kanyang fans.

Eh ngayong wala na siyang iniintinding iba kundi sarili, mas nakalalapit na ang fans na gustong makipag-selfie sa kanya. Ang kailangan nga lang siguro ay mai-repackage ni Daniel ang sarili niya, maaari siyang luminya sa action, o subukan ang iba’t ibang leading ladies na tiyak namang kakagatin pa rin ng solid fans niya. 

Sa ngayon ang nakikita natin ay ang tunay na suporta ng fans sa kanya at hindi sa kanilang dalawa ni Kathryn.