Zsa Zsa nakahanap solusyon sa sakit sa kidney

HATAWAN
ni Ed de Leon

NAGULAT kami sa picture ni Zsa Zsa Padilla na nasa isang ospital. Iyon pala ay ang matagal na niyang problema sa kidney. Noon ay sumailalim na siya sa operasyon para roon pero hindi pa rin nailagay sa ayos ang problema. Kaya pala siya nasa US at nakasama pa sa concert ni Sharon Cuneta ay talagang naroroon siya para magpagamot pero mukhang wala roon ang hinahanap niyang solusyon. 

May nagsabi raw sa kanya na ang mas mahuhusay ang doktor na maaaring tumingin sa kanya ay nasa Singapore, kaya roon naman siya nagpunta.

Nakakuha na yata siya ng isang espesyalistang titingin sa kanya at nagsagawa na iyon ng iba’t ibang test na kailangan para malaman kung ano ang maipapayo sa kanya. Mukha naman daw maganda ang kinalabasan, ibig sabihin may nakikita silang isang definite cure para kay Zsa Zsa.

Sana nga ay makatagpo na siya ng kagalingan sa sakit na dinadala na niya simula noong bata pa siya.