HATAW! D'yaryo ng Bayan hatawtabloid.com
GAGAWARAN ng Komisyon sa Wikang Filipino (KWF) ng Kampeon ng Wika 2024 sina Raymund M. Pasion, PhD; Nora J. Laguda, PhD; Almayrah A. Tiburon, Joel B. Lopez, PhD; Cristina D. Macascas, PhD.
Si Raymund M. Pasion, PhD ay nanguna sa pagtaguyod ng pabubukas ng programang Batsilyer ng Sekundaryang Edukasyon medyor sa Filipino sa taong 2014 sa Davao Oriental State University. Nakita niya ang pangangailangan ng probinsiya na magkaroon ng maraming tagapagtaguyod at tapagturo ng pambansang wika. Kumatha rin si Dr. Pasion ng mga artikulo at aklat ukol sa “Varáyti ng Filipino ng mga mag-aaral sa Lungsod ng Mati, kabisaan sa paglinang ng Filipino,” at marami pang iba.
Si Nora J. Laguda, PhD ay napaunlad ang kasanayang pangwika at pampanitikan ng mga guro at mag-aaral sa Filipino nang siya ay maging Tagamasid Panrehiyon ng Kagawaran ng Edukasyon, Rehiyon V sa DepEd Rehiyon 5. Ginampanan niya ang iba’t ibang gawaing pangwika, pagsusuri ng mga kagamitang pampagtuturo at pagkatuto, pamamahala sa mga programa at pagsasanay kaugnay sa pagpapaunlad at pagpapayaman ng Filipino, at iba pang kaugnay na atas ng tungkulin.
Si Almayrah A. Tiburon, PhD ay may angking galing sa pagsusulat at naitampok siya sa Mustaqim Philippines (Muslim and another native of Mindanao identified among SPOT PH’s 10 most noteworthy Filipino Writers), MSU Newsletters (Almayrah: An Epitome a Mëranaw Woman on Pages), “Siyam na Awtor na Nagsusulat sa Wikang Filipino,” artikulo para sa CNN Philippines, Mindanao Creative & Cultural Workers Group, Inc.; “S’bang Ka Marawi” Episode 90; Songs Sprung from Native Soils: More Conversations with Eight Mindanao Writer (Best Book of Literary History in English sa National Book Awards 2022).
Si Joel B. Lopez, PhD ay isang alagad ng wika na may mga natatanging ambag at nagawa sa usaping pangwika kabilang ngunit hindi limitado sa pagsusulong sa paggamit ng Filipino at Ilokano sa Korespondensiya Opisyal ng DepEd, pagpapalit ng mga selyo ng tanggapan gamit ang wikang Filipno mulang Ingles, pagsusulong ng Ortograpiyang Pambansa at Ortograpiya ti Pagsasao nga Ilokano, preserbasyon ng wikang Ilokano; pagtuklas sa umpisang literasi sa Ilokano, kontribusyon sa pagsasalin; paggamit sa wikang Filipino at Ilokano sa mga awit ng sangay (Lungsod Batac at Lungsod Laoag), at aktibong pakikibahagi sa mga gawain ng KWF.
Si Cristina D. Macascas, PhD ay edukador mula sa Pamantasang Normal ng Pilipinas na kilala sa husay niya sa Filipino at sa kaniyang pagsisikap sa larangan ng pagtuturo sa Filipino. Sinimulan ang pagsasangandiwa ng mga gawain na nagtatampok sa kaalaman at kahusayan ng mga estudyante sa pamamagitan ng WIKAsaysayan, pagsagawa ng paligsahang pampaaralan na Gamhanan para sa Filipino at Araling Panlipunan, nag-evaluate ng mga modyul at aklat para sa Kagawaran ng Edukasyon at awtor ng modyul ng Pedagohiya ng Wikang Filipino para sa programang Linking Standards and Quality Practice (LiSQuP).
Ang Kampeon ng Wika ay iginagawad sa mga pilíng indibidwal at institusyon na ipinalalaganap ang wikang Filipino at mga wikang katutubo sa kani-kaniyang larangan. Mulang 2013, nakapaghirang na ang KWF ng mga Kampeon ng Wika sa mga alagad ng midya, pelikula, panitikang rehiyonal, organisasyong pampanitikan hanggang sa dominyo ng kultura, politika, musika, at akademya.
