Mark mala-bangungot ang naranasan sa Amerika, pinaulanan ng bala

MA at PA
ni Rommel Placente

INAKALA ni Mark Bautista na katapusan niya na noon, nang maranasan ang shooting incident sa America.

Itinuturing ng singer na himala ang nangyari sa kanya at sa ilang kaibigan nang muntik na silang mamatay matapos masangkot sa shooting incident noong 2017 sa Seattle, Washington.

Base sa panayam kay Mark ni Luis Manzano, na napapanood sa YouTube channel nito, second life na nga raw niya kung tutuusin.

Inalala ng Kapuso star na mala-bangungot na karanasan, kasama ang kanyang mga kaibigan sa musical theater play sa US.

“Nasa likod kami, ‘yung nag-Uber kami, and then may kotse lang sa harap namin na biglang nag-stop. Then may lumabas na lalaki sa sun roof nila. May hawak na dalawang baril talaga,” pagbabalik-tanaw ni Mark.

“So talagang gumanoon, (lumingon) siya sa likod, nagpaulan talaga siya ng (bala) baril,” kuwento pa niya.

Mas tumindi pa raw ang kanilang takot nang makitang nabutas ang mga pintuan ng kanilang sasakyan at nabasag din ang mga salamin. Feeling ni Mark ay katapusan na nila at hindi na siya makababalik ng Pilipinas.

“So ako talaga noon, akala ko talaga last na iyon na hindi na ako makauuwi ng Pilipinas. Ganoon na ‘yung feeling ko,” pagbabahagi pa ni Mark.

Kasunod nito, maraming realizations sa buhay si Mark kabilang na ang desisyong magpakatotoo sa sarili at aminin na sa buong mundo ang kanyang pagiging bisexual.

“Right after (umamin sa sexual preference), it was hard. Right after, I was ready na parang, ‘Okay. Whatever happens, I’m okay. It’s out there.

“Iyon naman ang gusto ko na parang wala ng tanong-tanong, wala ng ano-ano, I’ll be happy and free, and I’ll just live my life,” lahad pa niya.

Mula rin noon, nag-promise si Mark sa sarili na hinding-hindi na siya mabubuhay sa pagtatago o pagkukunwari. Mas gusto na raw niyang ibandera sa publiko kung sino talaga siya.