HATAW! D'yaryo ng Bayan hatawtabloid.com
HUSTISYA ang sigaw ng isang ginang matapos ang karumal-dumal na pamamaslang sa kaniyang anak sa loob ng boarding house sa Brgy. Bulacao, lungsod ng Cebu, nitong Biyernes, 2 Agosto.
Nananawagan s i Letecia Relativo sa agarang pagdakip sa pumaslang sa kaniyang 27-anyos anak na hanggang ngayon ay tinutukoy pa ang pagkakakilanlan.
Natagpuang wala nang buhay ang katawan ng biktimang kinilalang si Charina, sa loob ng kaniyang inuupahang silid sa isang boarding house, sa nabanggit na lungsod.
Kasalukuyang hinihintay ng pulisya ang resulta ng awtopsiya bago magbigay ng konklusyon na ginahasa muna bago pinatay ang biktimang natagpuang hubo’t hubad at puno ng pasa ang katawan.
Ayon kay Letecia, mayroong mga indikasyon na nanlaban ang kanyang anak sa suspek.
Aniya, naniniwala siyang sinakal si Charina hanggang bawian ng buhay at puno ng pasa ang dalawang braso, tanda na lumaban ang kanyang anak sa umatake sa kaniya.
Ayon kay P/Maj. Jiceree Basitao, hepe ng Inayawan Police Station, matutukoy nila sa awtopsiya kung ginahasa muna ang biktima bago pinaslang.
Dagdag ni Basitao, wala pa silang suspek kaugnay sa krimen ngunit nasa kanila nang kustodiya ang isang person of interest na kinilalang si Darren Cui.
Nabatid na boardmate ni Charin at ng kanyang live-in partner na si Jungie Enriquez si Cui.
Ayon sa affidavit ni Enriquez, pinakiusapan niya si Cui na tingnan ang kalagayan ni Charina dahil nauna siyang pumasok sa mall na kanilang pinapasukan.
Ani Enriquez, hindi pa dumarating sa kanilang trabaho ang biktima at hindi rin online sa kanyang Facebook Messenger kaya niya pinakiusapan si Cui na tingnan ang kaniyang kinakasama.
Agad tumawag ng pulis ang pamunuan ng boarding house nang madiskubreng wala nang buhay ang biktima sa kaniyang silid.
