Angeline na-stress sa sakit na Gestational  Diabetes

MATABIL
ni John Fontanilla

IWAS muna sa pagkain ng matatamis at kanin ang Kapamilya singer-actress na si Angeline Quinto dahil sa sakit nitong  gestational diabetes.

Inamin ni Angeline sa kanyang vlog ang sakit at ‘di nga nito maiwasang ma-stress at mag-alala na baka may epekto sa kanyang pagbubuntis.

“Siguro sa lifestyle, lalo na sa pagkain ko,” aniya. “Aminado naman ako na parang medyo wala akong control ngayon [sa pagkain], lalo na ang dami ko ring ginagawang work out-of-town tapos dito sa Manila.”

Dagdag pa nito, “Nakalulungkot lang kasi sabi niya na pwedeng makaapekto kay baby, so dapat kailangan ko nang magbago ng lifestyle. Kailangan ko nang magbago kasi jusko ang lakas ko kasi sa kanin.”  

“Basta disiplina lang at siyempre para kay baby talaga. Na-stress ako,” dugtong niya. 

Nagpakabit din ang singer ng Continuous Glucose Monitors (CGM) “para namo-monitor natin lagi at agad-agad ‘yung sugar natin kung mataas o mababa or kung name-maintain ang tamang sugar na kailangan,” ani Angeline.