HATAW! D'yaryo ng Bayan hatawtabloid.com
ni Allan Sancon
FIT na fit humarap sa entertainment press ang dating Sex Goddess-turned-actress singer na si Ara Mina para sa press conference ng kanyang nalalapit na 30th Anniversary Concert sa Newport Performing Arts Theater sa Newport World Resorts, Pasay City, ang All Of Me sa July 11, 2024, 8:00 p.m..
Isa sa paghahanda ni Ara sa kanyang concert ay ang intense work out kaya kitang-kita namang pumayat at very sexy ang singer-actress.
Natanong namin kay Ara kung ano ba ang top 5 highlights of her career sa kanyang 30th anniversary sa showbiz.
“Una ‘yung naging part ako ng ‘That’s Entertainment.’
“Pangalawa, ‘yung pagre-launched sa akin sa pelikulang ‘Maldita’ kasi from teeny bopper to sexy actress at tinawag pa na Sex Goddess of Philippine Entertainment.
“Pangatlo, ang pagkakaroon ko ng album at nabigyan ako Gold Record award dahil sa aking kantang ‘Ay, Ay, Ay, Pag-ibig’ at nasundan pa ng another album. Bale na established ako bilang singer.
“Fourth ay ang pagkakaroon ko ng best actress award sa pelikulang ‘Mano Po.’ Kumbaga, from sexy actress ay nakatawid ako bilang versatile actress.
“Lastly, fulfillment din ‘yung maging host ako ng sarili kong talk show program sa Net 25, ang ‘Magandang Araw.’l
Nabiro tuloy namin si Ara kung sino naman ang top 3 boys na very memorable part ng kanyang lovelife at pabiro naman niyang sinagot na, “Una siguro ‘yung time ng ‘That’s Entertainment’ na may nagsuntukang dalawang boys dahil sa akin (sabay tawa). Pangalawa siguro si J.Y. (Jomari Yllana) at pangatlo, siyempre itong napangasawa ko na si Dave Almarinez.”
May mga pasabog na performances si Ara sa concert niyang ito na bukod sa pagkanta at pagsasayaw ay may hindi pa nakikitang surprise talent ang aktres na ngayon lang mapapanood ng kanyang mga tagasubaybay.
Magiging guests ni Ara sina Martin Nievera, Cristine Reyes, Ogie Alcasid at marami pang iba.
