CJ Navato at Nicole Omillo ilang beses naghalikan sa isang musical play

MATABIL
ni John Fontanilla

HINDI lang pala mahusay umarte kundi napakahusay ding kumanta ng Goin’ Bulilit alumni at Kapamilya artist na si CJ Navato.

Sobrang napa-wow! kami sa ganda ng boses nito na sinabayan ng husay na pag-arte sa pinag-uusapan at laging sold-out na musical play na One More Chance.  

Nagkataon na nang manood kami nito kapartner niya ang napakaganda at napakahusay ding kumanta at umarte na si Nicolle Omillo.

Ang play ay hango sa blockbuster movie nina Bea Alonzo at John Loyd Cruz at katulad ng pelikula, napakahusay din ng pagkakagawa ng play.

Wala rin itong keber sa kung ilang beses naghalikan sila ni Nicole at sa pagpapakita ng kanyang magandang katawan sa entablado na nagpakilig sa mga beki at babaeng nanood.

Katulad ng napapabalita, nagkakaubusan o laging sold out ang ticket sa halos araw-araw na pagpapalabas nito na saksi kami sa dami ng taong nanonood.

Kaya naman kailangan  niyong panoorin ito or else baka magsisi kayo dahil napakaganda, kikiligin ka, iiyak at tatawa at mai-in-love sa magagandang awitin ng Ben and Ben na bumagay sa istorya nito.