HATAW! D'yaryo ng Bayan hatawtabloid.com
HATAWAN
ni Ed de Leon
NAGIGING natural na comedian si Atasha Muhlach simula nang mapasama sa Eat Bulaga. Marami siyang sundot na nakatatawa naman talaga kaya ipinauulit pa sa kanya ng mga kasama. Kung dati ang tawag lang sa kanya ay Tash ngayon tinatawag na siyang Tashing. Inilalapit talaga nila siya sa masa.
Malakas ang aming kutob na kung gagawa ng pelikula ang sino man sa TVJ tiyak na isasama nila si Tashing sa cast niyon. May sarili na rin siyang following. Aabot na rin sa milyon ang followers ng kanyang social media account na Dear Tash.
Ang tinatanong nila, ano naman kaya ang kalalabasan ni Andres? Mas malakas ang dating ni Andres kaysa kay Tash noong una pa pero hindi pa nga talagang defined ang papasukin niyang image bilang isang actor. Ngayon kasama siya ng kanyang pamilya sa isang sitcom, pero marami ang naniniwala na mas kikiligin sa kanya ang fans kung isang love story ang kanyang gagawin. Iyon nga lang dapat hindi siya lagyan ng permanenteng ka-love team. Malakas naman ang batak niya on his own kaya kung iba-iba ang kanyang makakatambal, mas lalawak pa ang kanyang fan base.
At sa ngayon, mukha namang walang maitatapat sa kambal ni Aga Muhlach. Ang sinasabi lang nila, baka mailaban kay Andres ang anak ni Judy Ann Santos dahil na rin sa hitsura niyon. Pero wala pa rin namang pruweba si Lucho, nakita lamang ng fans ang kanyang litrato sa social media.
