HATAW! D'yaryo ng Bayan hatawtabloid.com
HATAWAN
ni Ed de Leon
ANO nga kaya ang mangyayari sa pagpasok ni Darren Espanto bilang co-host ng It’s Showtime? Okey naman siyang guest co-host noon pang araw sa show, pero maski na nga si Vice Ganda hindi si Darren ang nasa isip.
Hindi nga ba kinakantiyawan niya si Aga Muhlach sa isang vlog interview niya na sana sa kanilang show naman ilagay ang anak niyong si Andres, dahil kailangan nila ang isang batang co-host. Pabiro pang sinabi niya na may rayuma na raw sina Vhong Navarro at Jhong Hilario na mga co-host niya, tapos nadagdag pa rin ang isang may rayuma ring si Ogie Alcasid.
“Sana naman dahil naibigay mo na si Atasha sa ‘Eat Bulaga’ sa amin naman si Andres,” sabi ni Vice.
Alam kasi ni Vice kung gaano kalakas ang batak ni Andres sa fans. Hindi pa man pumapasok sa showbusiness ay siya na ang hinahabol. Eh kung titingnan mo naman kasi sino bang male star sa ngayon ang kasing pogi ni Andres?
Ang inaasahan nga nila ang pagpasok niya ay magiging isang phenomenon kagaya rin ng tatay niyang si Aga noong panahon ng Bagets. Pero noon ay natatawa lang si Aga, hindi niya masabi at hindi naman alam ni Vice na si Andres ay nakapirma na sa Viva at sa TV5 para sa isang sitcom na ang lalabas ay ang kanilang pamilya.
Papayag ba ang TV5 na ipahiram pa si Andres sa isang show ng kalaban nilang network? Hindi pa naman natitigil ang network wars ngayon, ang magkalaban naman ay GMA at TV5 na parehong sinasakyan ng ABS-CBN dahil wala nga silang prangkisa at sa mga iyon nila nailalabas ang kanilang mga programa.
Kaya ang panalo pa riyan in the end, ang ABS-CBN dahil nagagamit nila ang lahat ng networks para sa shows nila na nailalabas nila kahit na wala silang prangkisa.
