HATAW! D'yaryo ng Bayan hatawtabloid.com
HATAWAN
ni Ed de Leon
NAPAKA-SIMPLE ng pagpapakasal nina Zanjoe Marudo at Ria Atayde. Walang kaingay-ingay, naikasal na pala ni Mayor Joy Belmonte ang dalawa noong Sabado ng hapon. Pero hindi naman nila inilihim iyon. Kasi marami pa rin silang kaibigan na nakarating sa reception kahit na nga hindi na sa talagang kasalan. Ibig sabihin ay kanilang kinumbida. Tama lang naman iyon dahil kung iyan ay naging open sa publiko baka magmukha namang karnabal ang kasalan nila. Kaya nga iyong ibang celebrities nagpapakasal sa mga malalayo at pribadong lugar para hindi magulo ang mga tao eh. Itong sina Ria at Zanjoe, nasa Quezon City lang pero nakaligtas sila sa mga maraming mag-uusyoso.
Ang susunod namang pag-uusapan ngayon ay kung kailan darating ang kanilang baby. Marami ang humuhula na baka sila pa raw ang unang makapagbigay ng apo kina Art Tayde at Sylvia Sanchez.
Aba hindi naman masama kung mangyayari nga iyon. Matagal na rin namang naghihintay sila ng apo lalo na si Art. Baka sakali ngayon mapabilis na ang kanyang paghihintay.
Masyado kasing busy ang anak niyang si Arjo na isa pang congressman bukod sa pagiging artista, at ang manugang niyang si Maine Mendoza na artista na nga, marami pang negosyong binabantayan. Iyon nga siguro ang dahilan kung bakit nagtatagal ang pagkakaroon nila ng baby.
Pero hindi mo masabi, may mga mag-asawang matagal bago magkaroon ng baby pero basta naman nasimulan na sunod-sunod ang dating.
