HATAW! D'yaryo ng Bayan hatawtabloid.com
MATABIL
ni John Fontanilla
SINISIMULAN nang gawin ang dream house ni Teejay Marquez sa Quezon City.
Kuwento nito nang makausap namin, pangarap nila ng kanyang yumaong lola na magkaroon ng sariling bahay.
“Sobrang happy ako kasi sa wakas masisimulan na ‘yung pagpapagawa ko ng dream house. Actually dream house namin ng lola ko.
“’Yun nga lang ‘di na niya inabutan kasi namatay na siya, pero alam ko naman na nandyan lang siya at masaya siya na matutupad ko na ‘yung pangarap namin na dream house,” ani Teejay.
Ilang milyon ang halaga ng mala-mansion na bahay na pinagagawa ni Teejay, pero ayaw nitong sabihin ang kabuuan ng halaga nito.
Kaya naman mas naka-focus siya sa pagtatrabaho ngayon at walang oras sa lovelife dahil malaki-laking halaga rin ang magagastos sa pagpapagawa.
“Kaya need ko magtrabaho ng magtrabaho para panggastos sa ipinatatayo kong bahay. Dito muna ako naka-focus at saka na ang lovelife, may tamang oras para riyan.
“Ilang milyon din ang kailangan ko para sa house, ‘di pa kasama ‘yung mga bagong gamit at appliances at iba pa,” anang aktor.
Sa ngayon ay masaya si Teejay dahil sunod-sunod ang kanyang trabaho mapa-TV, pelikula, at TV commercials kaya naman nakaiipon siya.
