HATAW! D'yaryo ng Bayan hatawtabloid.com
NASAKOTE ng pulisya ang suspek sa pagpatay sa 25-anyos pool hustler habang nakikipag-inuman sa kanyang mga katropa sa Malabon City.
Bukod kay alyas Raffy, 43 anyos, ng Dumpsite, Sitio 6, Brgy. Catmon, binitbit din nina P/Lt. Melanio Medel Valera III, Commander ng Malabon Police Sub-Station 4, ang kanyang kainuman na si alyas Roque, 31 anyos, nang pumapel at tinangkang pigilan ang mga pulis sa lehitimong operasyon.
Lumabas sa imbestigasyon nina P/SSgt. Bengie Nalogoc at P/SSgt. Michael Oben, naganap ang insidente habang naglalaro ng bilyar ang biktimang si alyas Kirk at ang 23-anyos testigong si alyas Jayson noong Sabado ng gabi sa Pisaca Sitio 6, Brgy, Catmon.
Sa ulat, bigla na lamang sumulpot ang suspek na armado ng kalibre .45 baril at malapitang pinaputukan sa ulo ang biktima sa harap mismo ng kanyang kalaro. Naisugod pa ang biktima sa Ospital ng Malabon ngunit hindi na umabot nang buhay.
Sa pahayag ng live-in partner ng biktima kay SSgt. Nalogoc, bago nangyari ang pagpatay ay nanalo sa larong bilyar ang kanyang kinakasama pero humirit ang kalaro ng isa pa ngunit tinanggihan na ng biktima.
Dahil sa impormasyong ibinigay sa pulisya ng testigo, walang humpay na nagsagawa ng hot pursuit operation ang pulisya hanggang matunton ang suspek habang nakikipag-inuman sa Dumpsite Sitio 6 noong Linggo ng gabi na nagresulta sa kanyang pagkakadakip.
Sinampahan ng pulisya ng kasong murder ang suspek at obstruction of justice naman kay Roque sa Malabon City Prosecutor’s Office habang isinailalim sa ballistic examination ang isang basyo ng bala ng kalibre .45 pistola na nakuha sa crime scene. (ROMMEL SALES)
