Gwen gusto pa ring makita si Jaclyn

HATAWAN
ni Ed de Leon

NAALALA namin noong araw may pelikulang ang title, Nagalit ang Patay sa Haba ng Lamay. Hindi na namin matandaang gaano, dahil bata pa kami noon basta iyon ay isang comedy picture.

Nabanggit lang namin dahil hindi nasunod ang brief and simple wake na ambisyon ng pamilya ni Jaclyn Jose humaba rin ng ilang araw ang lamay at lahat ay kung ano-ano na ang sinasabi sa naging karanasan nilang kasama ang aktes kahit na gaano ka-insignificant iyon. Lahat may statement dahil sa ganoong paraan nga naman nababanggit din ang kanilang pangalan sa issue.

Pero ang totoo pala kaya humaba nang humaba ang lamay ay dahil gusto nilang hintayin kung makauuwi nga ang anak na lalaki ng aktres si Gwen na nasa US. Madali naman daw siyang makauwi anytime, ang problema lang ay ang kanyang re-entry sa US pagkatapos. Eh nag-aaral siya roon sa ngayon sayang kung hindi siya makababalik kaya hinihintay muna niyang maayos ang papeles niya bago siya umuwi. 

Kung hindi man niya abutin ang inurnment ng ermat niya, at least mapuntahan man lang niya ang huling hantungan niyon.

In the meantime, ang tumatayo namang panganay ay si Gabby Eigenmann na siyang umaalalay kay Andi sa lahat ng desisyon, habang wala pa nga si Gwen.

Hindi kilala sa showbiz si Gwen dahil hindi naman siya nag-artista bagama’t noong araw pa raw ay may mga offer na rin siya na maging isang actor pero ayaw niya at ang gusto niya ay music. Iyon nga siguro ang namana niya sa kanyang amang si Kenneth Ilagan.

Hindi rin natin alam, talaga palang close si Gwen sa kanyanga ina, at sinasabi nga ng aktres na ang anak, “ang huling lalaki sa aking buhay.” Masakit para kay Jaclyn na mapalayo kay Gwen, pero sinasabi nga niya, “hindi ko maaaring hadlangan kung ano ang kaligayahan ng aking mga anak.”