James makalusot kayang top influencer sa abroad?

HATAWAN
ni Ed de Leon

HINDI naman daw pinangarap ni James Reid na mapili siyang top influencer sa ginagawa niya ngayong mga endorsement sa abroad. Una hindi naman niya dapat asahan talaga iyon dahil sa abroad ay hindi naman siya masyadong kilala, at kung dito sa Pilipinas ay napakabilis niyang sumikat dahil pogi siya, roon ay marami at karaniwan na ang ganoong mukha kaya hindi rin niya maaasahang mabilis siyang mapapansin.

Dito sa atin mabilis siyang napansin dahil sa pagsali niya sa reality show na Pinoy Big Brother tapos nasundan iyon ng iba pa hanggang sa mapunta nga siya sa Viva at itinambal kay Nadine Lustre. 

Sumikat ng mabilis anga kanilang love team at naging totohanan nga iyon. Apat na taon din silang nagsama sa bahay ni James hanggang sa magkahiwalay din. 

Tinangkang batakin ni James si Nadine sa labas ng Viva hanggang sa nagkaroon pa ng demandahan at natalo si Nadine. 

Kailangan niyang balikan ang kanyang pinirmahang kontrata sa kompanya. Noon natuluyan ang kanilang split. Nakumbinsi naman ni James si Liza Soberano na pumirma sa kanyang management company, nakumbinsi naman iyon pero mataas ang pangarap ni Liza, gustong maging Hollywood star,  na tipong mahirap naman.

Ngayon si James ay gumagawa ng mga kanta sa ilalim ng kanyang music company pero wala pa nga silang nagagawang hit kahit na isa. Nakalagay din sa alanganin mismo ang career ni James.

Tingnan na lang natin kung hanggang saan ang kanilang maaabot nang hindi naman masabing ang ginawa nila ay isang “care less decision.”