Sunshine ayaw tantanan ng tsismis inili-link sa isang may-asawa

HATAWAN
ni Ed de Leon

MAY isa pa ring nagkakalat ng tsimis tungkol naman kay Sunshine Cruz. Talaga yatang kahit na nananahimik si Sunshine, ayaw siyang patahimikin ng mga gumagawa ng tsismis, inili-link naman nila si Sunshine ngayon sa isang married man. 

Hindi kami naniniwala. Una, kilala namin si Sunshine, hindi iyan iyong babaeng papatol sa isang manliligaw dahil mapera. Mas maniniwala pa kami kung pogi ang manliligaw sa kanya, at walang sabit posibleng mahulog si Sunshine. Pero sa estado niya sa buhay sa ngayon? Hindi kami naniniwala sa mga ganyang tsismis.

Maaari namang sabihin ng kahit na sinong lalaki na liligawan niya si Sunshine, pero ang punto pa rin naman ay papatulan ba siya? Kung hindi naman siya patulan, papano masasabing syota na niya?

Kagaya nga ng sinasabi ni Sunshine, maaga siyang nag-asawa, at nagkaroon siya ng problema. Umibih siyang muli at akala niya ay ok na, nagkaroon din ng problema, kaya sabi niya ayaw na muna niya ng relasyon sa ngayon. Naniniwala siyang darating din iyan sa tamang panahon, pero hindi pa ngayon.

Eh iyang si Sunshine, may isang salita naman iyan. Hindi mo iyan aasahang magsasalita ngayon at bukas ay iba na ang statement. Hindi naman kagaya iyan ng isang artistang sikat noong araw magpapa-interview may sasabihin, tapos kinabukasan biglang pupunta sa estasyon ng radio at magde-deny sasabihing huwag paniwalaan ang isinulat sa kanya sa mga diyaryo. Kaya ngayon tingnan ninyo dahil laos na siya, wala nang nagsusulat tungkol sa kanya kundi ang mga troll niya, at puro sa Facebook lang ang labas nila.