HATAW! D'yaryo ng Bayan hatawtabloid.com
HATAWAN
ni Ed de Leon
NGAYONG araw na ito ang paglalabas ng unang pelikula sa ilalim ng CCP Lakbay Sine at sa pakikipagtulungan ng St, Paul’s University of Quezon City magkakaroon ng showing ang restored version ng pelikulang Anak sa James Reuter Theater, at pagkatapos ay magkakaroon ng talk back. Makapagtatanong ang mga nanood tungkol sa pelikula maging sa iba pang aspeto ng pelikulang Filipino. Ang haharap sa talk back ay sina National Artist for Film and Broadcast Ricky Lee, Star for All Seasons VIlma Santos na siya ring bida sa pelikulang Anak, at ang lumabas na sutil na anak sa pelikula, si Claudine Barretto.
Si Claudine ang kinikilala ring reyna ng prime time television noong mga panahong iyon.
Pambihirang pagkakataon iyang ganyang mayroon pang talk back dahil kadalasan gusto ring marinig ng mga tao ang kuwento sa likod ng pelikulang kanilang napanood at sino nga ba ang makasasagot niyon kundi ang mga artista mismo ng pelikulang iyon. Kung minsan gusto rin nilang malaman ang ilan pang aspeto sa paggawa ng pelikula at sino nga ba ang makaaalam ng kasagutan sa mga ganoong tanong kundi ang mga batikang artista rin.
Hindi madaling pagsamahin ang mga artistang gata nina Vilma at Claudine para sa isang talk back. Kaya napakagandang samantalahin ang pagkakataong iyan na ipinagkaloob ng CCP at ng SPUQC ng libre at walang bayad.
Sana ay dalasan nila ang mga ganyang programa at imbitahin din naman nila ang iba pang mga artista na interesadong makita ng publiko.
