HATAW! D'yaryo ng Bayan hatawtabloid.com
HATAWAN
ni Ed de Leon
AYAN, ngayon ay pinalalabas na kasalanan ng TVJ kung bakit mawawalan ng trabaho ang mahigit na 200 manggagawa ng TAPE Inc.. Kung hindi raw kasi umalis ang TVJ, o hindi nila binawi ang titulong Eat Bulaga kahit na sa kanila naman talaga iyon, hindi sila mapupunta sa Tahanang Pinasara. May trabaho pa sana sila.
Pero bakit TVJ ang sisisihin nila? Hindi ba ang TAPE Inc. ang gustong alisin na ang TVJ sa show? Natural humanap sila ng bagong trabaho. Hindi rin ba kahit na ipinipilit pang gamitin ng TAPE ang Eat Bulaga at nagbanta pang idedemanda ang TVJ basta ginamit nila iyon, lumayas na naman ang mga sponsor sa kanila dahil wala silang kadating-dating pati ang katulong sa pagtitinda ng pares ay ginawa pa nilang contestant at pinapanalo?
Natural kung saan naniniwala ang mga sponsor na maieendoso ng mas mahusay ang kanilang negosyo, roon sila. Palibhasa ay alaskador si Joey de Leon, kumuha rin sila ng isang alaskador na host, kaso iba ang pang-aalaska niyon. Inaanakan lang ang babae tapos hindi nagsusustento sa mga anak.
Dahil dating Senate President si Tito Sen, kumuha naman sila ng isang talunang presidentiable. Kinuha nila si Cassy Legaspi dahil sa paniwala nilang mipantatapat kay Maine Mendoza. Eh nakuha naman ng TVJ si Atasha Muhlach, eh ‘di butata na naman sila.
Hintayin ninyo baka pumasok na rin si Andres Muhlach sa Eat Bulaga dahil may kontrata na rin siya sa TV5. Bukod doon, naka-simulcast na ngayon ang Eat Bulaga sa RPN 9 na napakarami ring provincial stations. Paano pa nilang tatalunin iyan, eh kung nasa isang 50KW station nga lang sila na iilan ang provincial relay pinakamataas pa rin sila sa rating ng tatlohg noontime shows. Eh ngayon pa bang napapanood na silang muli mula Aparri hanggang Jolo?
