HATAW! D'yaryo ng Bayan hatawtabloid.com
HATAWAN
ni Ed de Leon
NAGULAT kami sa sunod-sunod na post sa social media na ang sinasabi ay, “Please pray for Zeke.” Akala naming kung ano na ang nangyari kay Jericho del Rosario, ang new comer na gumaganap sa role ni Zeke sa isang internet series. Kasi kamakailan ay ikinukuwento niyang sunod-sunod na namatay ang mga lolo niya.
Hindi kilala si Jericho ng mga sumusunod sa mainstream showbusiness, dahil bukod sa nakasama siya sa isang tv series, ang sumunod niyang assignment ay puro internet series lamang, na ang tema pa ay puro gay. Napansin namin iyang si Jericho dahil isang male star din ang nagsabi sa amin na panoorin namin siya dahil magaling daw umarte at may hitsura din naman. Ang sabi nga nila ay puwede sa mainstream.
Napanood nga namin ang ilang episodes ng kanilang serye at mahusay ngang umarte si Jericho, at mukhang malakas nga ang batak sa fans. Katunayan mas napapansin pa siya kaysa ilang kasabayan niyang higit na nauna sa kanya.
Kuha niya ang fans eh, kaya palagay namin, kung lilipat nga iyan sa main stream, mas magiging maganda ang kanyang career, at tiyak na mas kikita rin siya ng malaki kaysa kinikita niya sa mga internet series. Sayang iyong bata kung magtitiis na lang siya sa internet series eh.
Mabalik tayo sa mga post na ‘Let’s pray for Zeke.’ Wala naman palang masamang nangyari kay Jericho kundi sa kuwento ng kanilang series, nabangga ang minamaneho niyang kotse papuntang Maynila. Natapos ang episode na ipinakita siyang nakasubsob sa manibela at duguan ang mukha. Iyon lang at nabahala na ang fans.
Marami nga ang nagsasabi, sa lakas ng dating ni Jericho, nasapawan niya ang lahat ng iba pang stars sa kanilang serye eh. Guwapo kasi at magaling umarte. Mayroon guwapo nga pero ampao naman ang arte, kaya wala rin. Mayroon may hitsura nga pero sira naman ang image, wala rin.
Kung kami ang tatanungin, sana nga makalipat na sa mainstream si Jericho del Rosario.
