HATAW! D'yaryo ng Bayan hatawtabloid.com
ILALABAS na rin daw dito sa PIlipinas ang pelikulang ginawa ni KC Concepcion sa abroad, iyong Asian Persuasion. Hindi naman iyon isang malaking pelikula. B movie iyon sa US, kumbaga dito sa atin ay indie, pero dahil kasama nga sa pelikula ni KC magmumukhang malaki iyon oras na ilabas sa PIlipinas dahil sa popularidad ng anak nina Sharon Cuneta at Gabby Concepcion.
Kung natatandaan ninyo, malakas din naman sa box office ang mga naunang pelikula ni KC, lalo na ang mga pinagtambalan nila noon ni Richard Gutierrez na mainit din ang popularidad noong panahong iyon.
Iyan ang isa pang team up na siguro kung uulitin, magiging hit ding muli sa audience. Naging hit naman si Richard noong itambal nga siya noon kay KC at saka kay Angel Locsin. Pero hindi na nagtuloy-tuloy iyon dahil si KC naman noong mga panahong iyon ay halos walang panahon sa showbusiness dahil nag-aaral pa siya. Si Angel naman biglang lumipat sa ABS-CBN kaya naiwan si Richard sa GMA pero malakas pa rin naman siya hanggang sa magdesisyon nga siyang tumigil muna nang mag-asawa.
Siguro kung ngayon ay gagawa ng isang pelikula sina Richard at KC papatok din nang husto iyon.
