HATAW! D'yaryo ng Bayan hatawtabloid.com
HATAWAN
ni Ed de Leon
NAGSISIMULA nang lumabas ang mga litrato ni Matteo Guidicelli na bahagi ng promo ng kanyang pelikula. Ok naman sana, pero nang balikan namin ang mga lumang picture, naisip lang namin na kung ang hitsura ni Matteo ngayon ay kagaya ng ayos at hitsura niya roon sa serye nilang Bagani, aba ‘di hamak na mas makatatawag siya ng pansin.
Kung sabagay, maiiwasan ba naman ang pagtanda ng isang tao? Ang problema lang, iyong Bagani ang huling serye na siyang napanood at ang ayos niya roon ang natatandaan ng mga tao. Iyong hitsura niya roon ang natatandaan namin eh, tapos ngayon sa mga bago niyang pictures, mukhang tumanda siya. Natural naman tatanda siya dahil ilang taon na rin ang nakaraan simula noon, tapos nag-asawa pa siya na siyempre nabago na ang life style niya dahil doon, pero mukhang nabawasan na ang kiliti sa hitsura ni Matteo.
Hindi nakabuti ang matagal niyang pagkawala. Kasi nga siguro nagpalamig din sila sa naging controversy ng bigla at inilihim nilang kasal ni Sarah Geonimo, na hanggang ngayon hindi pa yata sila in good terms ng pamilya ng kanyang asawa. Natural lang naman. Hindi sa kahit na anong dahilan iyon eh. Hindi mo masasabing ok lang dahil sinusuportahan pa rin naman ni Sarah ang kanyang pamilya kahit na may asawa na siya. Hindi sa suporta iyon eh. Ang masakit doon, iyong nangyaring nagpakasal si Sarah ng inilihim sa kanyang mga magulang? Maling diskarte iyon kahit na anong tingin ang gawin ninyo.
Hindi ninyo masasabing nasa tamang edad na si Sarah, hindi katuwiran iyon eh. Hindi naman sinabing igalang mo ang mga magulang mo hanggang wala ka pa sa edad. Malaki ang epekto niyon sa kanilang image. Hindi naman nila natakpan ang mga issue na iyon eh. Pati ang pagsuntok ni Matteo sa driver ni Sarah na nagsabi sa nanay ng songstress na ikinakasal na iyon sa aktor kaya sumugod ang nanay niya sa reception. Naayos iyon in a way dahil hindi na nga nagdemanda ang driver-bodyguard ni Sarah, pero nakarating pa iyon hanggang kay Tulfo. At alam naman ninyo basta nakarating doon, eskandalo na iyan. Ang ginawa nilang damage control “dead ma” at ngayon natin malalaman ang epekto niyon.
Pero huwag na nating pakialaman iyon, magbalik na lang tayo sa hitsura ni Matteo sa ngayon. Sinasabi pa rin namin na mas mukha siyang local hero sa hitsura niya sa Bagani kaysa lumabas na mga picture niya ngayon. Hindi naalagaan eh, mukha siyang masyadong matured, eh ang panlaban pa naman ni Matteo, pogi siya.
