HATAW! D'yaryo ng Bayan hatawtabloid.com
HATAWAN
ni Ed de Leon
WALA na bang masasabi ngayon si Andrea Brillantes kundi kung sinong lalaki ang crush niya. Aba simula nang isplitan siya ni Ricci Rivero, parang naghahanap na talaga si Andrea ng maaari niyang pagbalingan. Bigla niyang sinabi na gusto niyang maka-date ang anak na lalaki ni Ina Raymundo, si Jacob Portunak dahil pogi raw iyon kaya lang nang ma-meet kasi niya iyon ay on pa sila ng ex niya.
Ngayon naman ang sinasabi niya four years old pa lang siya talagang crush na niya si Paul Salas. Sino naman kaya ang isusunod niyang sasabihin niyang crush niya?
Ang masakit wala namang isa man lang sa sinasabi niyang crush niya ang may balak na manligaw sa kanya. Samantalang si Ricci mukha ngang naka-move on na at visible na sila ng dating beauty queen at ngayon ay konsehal ng Los Banos na si Lara Mae Bautista. Lalong pressure iyon kay Andrea na makakuha na rin ng kapalit ni Ricci.
Marami na rin naman kasing turned off kay Andrea. Natural lamang na matakot ang mga lalaki, aba eh kung magsyota na kayo at regaluhan ka niya ng kung ano-ano, tapos isusumbat pala niyang lahat kung break na kayo. Malabo iyon. Isipin mo kung syota mo siya, pupunta siya sa bahay mo at oras na magkagalit kayo marami na siyang ilalabas na baho sa bahay mo, na hindi niya naamoy noong natutulog pa siya roon. Natural matatakot na makipag-relasyon ang isang lalaki sa babaeng ganyan.
Isa pa, umiiwas din naman sila sa kantiyaw, dahil hanggang ngayon naman ay mukhang hindi pa nakalilimutan ng mga tao ang lumabas na video scandal noon ni Andrea na siya rin ang may gawa. Ayaw din ng mga lalaki lalo na at kung konserbatibo ang mga ganyang issue, nakakapikon iyan eh.
Sa ngayon ang maipapayo namin kay Andrea, kumalma na lang muna at palipasin ang mga hindi magagandang usapan, darating din naman ang araw na makakatagpo siya ng para sa kanya at bago siya pumasok sa isang relasyon, magsiguro na muna siya.
