HATAW! D'yaryo ng Bayan hatawtabloid.com
HATAWAN
ni Ed de Leon
NAG-POST sila ng isang eksena sa serye na nakikipagsuntukan si David Licauco, at mabilis nilang sinabi na mukhang maganda ang kanyang future bilang isang action star.
Aba, hindi naman dahil nakipagsuntukan ka lang sa isang eksena, action star ka na. Mas mahirap maging action star kaysa maging isang matinee idol. Pero siguro nga napuna na rin nilang hindi naman talaga kinakagat ng mga tao ang pinipilit nilang love team ni David kay Barbie Forteza, kaya gusto nilang unti-unti ay ibahin na naman ang image niyon. Iyang image at popularidad ng isang artista ay hindi maididikta ng network sa masa. Dapat pabayaan lang nilang tumakbo ang career ni David ng normal, at kung saan siya kagatin ng masa, suportahan nila ng proyekto.
Kasi kung ipipilit ang hard sell na build up, nahahalata rin iyan ng masa at lalo silang hindi maniniwala. Hindi pa ba sila natuto matapos nilang bigyan ng lahat ng klaseng build up si Francheska Farr? Nasaan na iyon ngayon? Sinubukan din naman nila iyan kay Julie Ann San Jose, natural ba ang following na nakuha niyon sa publiko?
Ngayon ganoon din ahg ginagawa nila kay David.
Mas sisikat iyang si David kung ilalagay sa ayos ang pagbi-build up sa kanya.
Napakahirap niyong ‘hinog sa pilit.”
