HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
TEASER pa lang ng pelikulang isasabak ng 7K Entertainment sa Metro Manila Film Festival 2023 (na sana’y mapili na kokompleto sa natitirang apat na entry), panalo na agad. Ang tinutukoy namin ay ang In His Mother’s Eyes nina Maricel Soriano, LA Santos, at Roderick Paulate.
Halos lahat ng nakapanood ng teaser ay pinuri ang pelikula at naiyak dahil sa istoryang makabagbag damdamin na talaga namang kumurot sa aming mga puso. Kaya nga ang usapan, teaser pa lang panalo na eh ano pa kaya kung buong pelikula na ang napanood namin.
Isa sa ipinakitang teaser ay ang confrontation scene nina Maricel at Roderick na gumaganap na magkapatid sa In His Mother’s Eyes, kasama ang ilang eksena ni LA na gumaganap namang special child na anak ng karakter ni Maria.
Kung pagbabasehan ang teaser, matagal naiwan ni Maricel sa pagkandili ni Roderick ang anak na si LA kaya naman hirap itong pakisamahan o intindihin ang gawi ng anak lalo’t special ito.
Kaya naman sa maikling teaser na iyon agad nabagbag ang aming damdamin dahil napakahusay naman talaga nina Kuya Dick at Maria.
Ang nakagugulat ay ang husay na rin ni LA sa pag-arte na ikinatuwa namin. Nasubaybayan din naman kasi namin ang career ng batang ito mula sa pagiging singer hanggang sa pagiging aktor. Kung nakailang teleserye na rin siya sa ABS-CBN at talaga namang pinaghusay ng batang ito ang pag-arte kaya hindi na kami nagtataka kung nakipagsabayan siya kina Dick at Maria.
SA totoo lang, si LA ang klase ng taong kapag may ginustong pagbutihin, nagagawa niya. Kaya tiyak na marami ang makapapansin sa ikinagaling ng batang ito. Napa-wow! kami sa ilang eksena lalo na iyong sa kanila ni Maricel.
Kaya nga sa kuwento ng kanyang inang si Mommy Flor Santos na excited at naiiyak minsan si LA kapag umuuwi galing ng shooting naiintindihan namin ito dahil makaeksena mo ba naman ang isang Dick at Maricel, naku malaking bagay iyon.
Kuwento pa ni Mommy Flor, naging close sina Maria at LA habang ginagawa ang pelikula.
“Feeling ko nga, mas mag-nanay pa ‘yung dalawa, eh. Naikukuwento niya lahat kay Maricel. Grabe ang suporta nila kay LA, lalo si direk (FM Reyes) din. Grabe ‘yung suporta nila, sobra, hindi magagawa ni LA ‘yun kundi dahil sa kanila,” emosyonal na pagbabahagi ni Mommy Flor.
Kaya naman ganoon na lamang ang pasasalamat ni Mommy Flor (producer) kina Maria at Dick, kay direk FM Reyes, at sa buong crew at staff ng pelikulang In His Mother’s Eyes dahil nakabuo sila ng isang napakagandang pelikula na ang istorya’y para sa mga LGBTQIA, special child, ina, anak.
Kaya naman sana’y masama sa natitirang apat na isasama sa MMFF 2023 ang In His Mother’s Eyes dahil bukod sa maganda ang istorya, reunion movie ito nina Maricel at Roderick pagkatapos ng maraming taon.
