Sylvia may  panawagan sa mga magulang

MATABIL
ni John Fontanilla

“ITO ang napapanahong teleserye para sa Millennials at Gen Z.” Ito ang iginiit ni Sylvia Sanchez patungkol sa kanilang bagong drama series sa ABS-CBN, ang Senior High.

Anang magaling na aktres, maraming mapupulot na aral sa kuwento ang  mga magulang.

Ang Senior High ay pinagbibidahan din nina Andrea Brillantes, Kyle7 Echarri, Elijah Canlas, Zaijian Jaranilla, Juan Karlos Labajo, Gela Atayde, at Xyriel Manabat.

“Isa lang ang masasabi ko, ito ‘yung dapat at napapanahong teleserye sa oras na ito para sa Millennials at Gen Z,  na mga nabu-bully at nababastos, sa mga anak din na nagkakaroon ng mental problems.

“Nagkakaroon sila ng problema, ang dami talaga. Alam natin na marami ang nagpapakamatay, kasi minsan, sa tingin ko, kaya gusto ko itong panoorin ng mga magulang, iyong sobrang pag-push sa mga anak, na hindi naman kaya ng anak, pero sumusunod ang mga anak.

“Kaya minsan, iyon iyong nagiging dahilan, nakalulungkot, kaya karapat-dapat itong serye na ito,” giit pa ni Sylvia.

Napapanood na ngayon sa iba’t ibang platforms ng ABS-CBN ang Senior High, 9:30 p.m. na idinidirehe nina Onat Diaz at Andoy Ranay, hatid ng ABS-CBN Entertainment at iWantTFC ang isang Dreamscape Entertainment production, tampok din sina Tommy Alejandrino, Gela Atayde, Baron Geisler, Mon Confiado, Desiree Del Valle, Kean Cipriano, Ana Abad Santos, Gerald Madrid, Inka Magnaye, Angeli Bayani, Ryan Eigenmann, Rans Rifol, Rap Robes, Kakki Teodoro, at Floyd Tena.