MWP No. 2 ng Samar nadakip sa Caloocan

NASAKOTE ng mga awtoridad sa ikinasang manhunt operation sa Caloocan City ang isang lalaking wanted sa kaso ng tangkang panggagahasa sa Eastern Samar, makalipas ang mahigit anim na taong pagtatago sa batas.

Kinilala ni District Special Operation Unit (DSOU) chief P/Lt. Col. Robert Sales ang naarestong akusado na si Nelson Alidon, 22 anyos, tubong Hernani, Eastern Samar at residente sa San Rafael, Guagua, Pampanga.

Sa kanyang report kay Northern Police District (NPD) Director P/BGen. Rizalito Gapas, sinabi ni Lt. Col. Sales, nakatanggap sila ng impormasyon na naispatan ang presensiya ng akusado sa Brgy. 8, Caloocan City.

Kaagad nakipag-ugnayan ang DSOU sa 2nd Coy ESPMFC, Hernani MPS Eastern Samar, PIU- ESPPO at DID-NPD saka nagsagawa ng joint manhunt operation sa pangunguna ni P/Lt. Armando Pandeagua, Jr., kasama ang NDIT-RIU NCR na nagresulta sa pagkakaaresto sa akusado dakong 3:30 pm sa Salmon St., Brgy. 8.

               Ani Lt. Col. Sales, si Alidon, rank no. 2 sa most wanted persons (MWP) ng Hernani Municipal Police Station (MPS) ay dinakip ng kanyang mga tauhan sa warrant of arrest na inisyu ni Presiding Judge Nathaniel E. Baldono ng Regioanl Trial Court (RTC) Branch 2, Borongan City, Eastern Samar noong 2 Agosto 2017, sa kasong Attempted Rape. (ROMMEL SALES)