HATAW! D'yaryo ng Bayan hatawtabloid.com
MA at PA
ni Rommel Placente
NAGKITA sa FIBA Basketball World Cup 2023 ang dating magkasintahang Gerald Anderson at Maja Salvador.
Kumalat sa TikTok ang video clip na lumapit si Gerald sa puwesto nina Maja at mister nitong si Rambo Nuñez sa may front seat area ng Philippine Arena sa Bulacan.
Sa paglapit ni Gerald sa mag-asawa, nagyakapan sila ni Rambo. Sumunod na nilapitan ni Gerald si Maja, at nagbeso pa ang mga ito.
Iyon ang first game ng Gilas Pilipinas laban sa Dominican Republic na ginanap noong August 25, 2023.
Pero bukod sa pagkikita ng ex-couple, pinuna ng netizens ang reaksiyon ng engaged couple na sina Sam Milby at Miss Universe 2018 Catriona Gray na nasa bandang likuran ni Maja.
Biro ng netizens, “forda marites” ang reaksiyon nina Sam at Cat sa nasaksihang pagkikita nina Maja at Gerald.
May mga nagkomento ring tila all is well kina Maja at Gerald dahil cool lang ang mga ito sa video.
Tingin din ng isang netizen, malaking bagay na hindi nagsalita si Maja tungkol sa hiwalayan nila noon ni Gerald kaya nanatiling civil ang mga ito.
Nakatutuwa si Gerald, at least, nagawa niyang unang lumapit kina Rambo at Maja, nang makita niya ang mga ito.
Matagal na rin naman silang hiwalay ni Maja. At siguro, kinalimutan niya na ang hindi magandang nangyari sa relasyon nila before, at masaya na rin naman siya sa piling ni Julia Barretto kaya nagawa nga niyang lapitan ang ex-girlfriend nang makita niya ito.
