Andrea milyones ang nairegalo kay Ricci, mga gamit sa condo sa kanya nanggaling

SHOWBIZ KONEK
ni Maricris Valdez Nicasio

BUMAWI si Andrea Brillantes sa mga isiniwalat niya ukol sa dating karelasyong si Ricci Rivero. Nakatitiyak kaming marami ang mapapa-wow! maiinggit, o mate-turn off.

Pero tiyak kaming mas marami ang maiinggit kay Ricci dahil sa milyones daw na naibigay ni Andrea sa basketball cager dahil sa sobrang pagmamahal nito sa kanya. 

Sa interbyu ni Vice Ganda kay Andrea para sa Youtube channel ng una, roon niya lahat ibinuking ang mga bagay-bagay tulad ng halos lahat daw ng laman ng condo unit ng basketball player ay bigay at regalo niya.

Nasambit ni Andrea na umabot sa milyon ang pinakamahal na naibigay niya sa binata.

“Hindi po siya actually bagay…” ani Andrea. Rito’y sumingit magsalita ang kapatid ni Andrea at sinabing isang project iyon na isinama si Ricci na ibinawas ang talent fee ang aktres.

“Ganoon ako mag-love, eh,” katwiran ni Andrea.

At sabay sabing, “Kahit saan po wala akong pinagsisihan kasi nagmahal ako. Kung mayroon man akong pinagsisihan ay ‘yung mga bagay na nasabi kong masakit kasi aaminin ko hindi rin ako perfect na girlfriend lalo na’t bagets-bagets pa ako, may mga hindi magandang nagawa,” ukol sa kung pinagsisisihan ba ang nagawa.  

Nang matanong naman ni Vice kung nagsauli si Andrea ng mga iniregalo sa kanya ni Ricci, sagot nito, “Hindi! Sentimental po ako, eh.  Although ‘yung isa balak kong isanla kasi hindi ko na nakikita ang sarili kong susuutin ko.

“Kasi magkakapera pa ako kapag ibinenta ko, may pang-shopping pa ako. Bakit  ko pa  ibabalik. Ang gagawin lang din niya ibibigay din niya sa iba ‘yun, eh,” ani Andrea.

At dito nasabi ni Vice na, “Wala bang ini-require na isauli kasi ‘di ba hindi naman na tayo, baka puwedeng ibalik na lang natin?’”

“Kasi alam n’yo po Meme kapag kinuha ko lahat ng ibinigay ko sa kanya (Ricci) wala na siyang gamit sa condo niya? Hindi ko gagawin ‘yun!” nangingiting sambit ni Andrea.

Iginiit pa ni Andrea na, “Talaga ba iiyakan ko ‘yung lalaking hindi nagpapa-laundry ng isang taon!?”

‘Yun na! Kabog!